शिक्षणाची गंगोत्री

अंगणवाड्या
बालवाड्या
प्राथमिक शाळा
माध्यमिक शाळा
खेडोपाडी
शिक्षणाची गंगोत्री
दुथडी भरभरुन वाहू लागली.
नवनव्या शिक्षणसंस्था
गवता सम उदंड झाल्या.

खरं म्हणजे
शिक्षण सोडून तिथं सारंच
चालतं.

राजकारणाचे अड्डे.
वशिल्याचे तट्टू,
चमचेगिरी करणारे,
आदर्श शिक्षण सेवक,
यांचाच भरणा जास्त.
आप्तेष्टांसाठी
राखीव कुरणं ही.

मग काय
रामा शिवा गोविंदा
फावळ्या वेळात शिकवणं
इतर वेळात शेती वा धंदा
शिक्षण जणु जोड धंदा

परिश्रम,निष्ठा,
समर्पणाची वानवा.
नवनवीन उपक्रम नाहीत
टुकुझुकू टुकुझुकू
शिक्षणाचा खटारा
चाललाय गचके खात.
गचके देत

संस्कारशून्य,मूल्यहीन
वातावरण.
प्रसार खूप.प्रचार हाच.

कुठल्याच नवनवीन कल्पना,
नव्या संवेदना,
भविष्याचा वेध घेऊन
जीव लावून काम करणारी
मने नाहीत.