फसवा साक्षात्कार -----

स्वप्नपरीसम आलिस दारी
गेेलिस माघारा
स्मृति कोषातच
गंध राहिला पुष्पाविण सारा---धृ
रेखिव बांधा,उजळ चेहरा
गौरकाय तू कुणी अप्सरा
फिरता फिरता कुंजवनी या
अवचित शर मज काय मारला
विद्ध दोन नजरा-------------
बोल लाडके मुग्ध हासणे
लबाड तव डोळ्यांचे लवणे
तनुलतिके तव पुढे चालणे
मादक उन्मादक स्पर्शाचा
शिंपित मधु फुलोरा-----------
रात्र धुंद अन् मस्त चांदणे
निवांत सारे नभात तारे
संगतीस तू अवखळ अन् मी
प्रिती प्राशन करुनी केला
धुंद नदी किनारा------------
हास भास तव स्पर्श डंख अन्
बोल प्रतिध्वनी ध्वनीच केवळ
तानही अर्धी रागही अर्धा
मैफिल अर्धी सोडुन सजणे
गेलिस माघारा-------------
क्षण फसवा मम अंतर वेडे
खळखळणाऱ्या निर्झरीणीतटी
त्याच प्रस्तरी बसुन अनुभवी
चैतन्याविण तव मूर्तीच्या
फसव्या साक्षात्कारा---------