स्थिरचित्त,आसनस्थ, ध्यानस्थ, पद्मपाणि, वज्रपाणि------

अजिंठा---
तरल स्वप्न
पाषाणातलं.
मधुर संगीत
धुंद गीत
धुंदीतच गायलं
त्यांनी _कलाविदांनी
हळुवार मन
तरल भाव,
दृढश्रद्धा
समर्पित वृत्ती
तिथं काळ्या पाषाणात
आकारली बुद्ध नगरी.
नितांत सुंदर
भव्य शिल्प
बोलकी चित्रे
नाना रंग
उठावदार,आकर्षक
कालौघात अजूनही
मूळचं सौंदर्य जपणारी
दया, करुणा,प्रेमाचा
आर्त संदेश देणारी
चित्रे ही.
बुद्धाच्या अनंत जन्मांच्या
 अगणित लीला,जातक कथा
सांगून जातात ती.
विस्मित मी स्मित पाहून
कालातीत भाव मुद्रा
आगळ्या,वेगळ्या
स्थिरचित्त, आसनस्थ,
ध्यानस्थ,पद्मपाणि,वज्रपाणि.